ကမ္ဘာ့စားသုံးသူ အခွင့်အရေးများနေ့ အထိမ်းအမှတ်အဖြစ် ဂန့်ဂေါမြို့၊ မြို့မစျေးတွင် စားသုံးသူရေးရာဦးစီးဌာန ဂန့်ဂေါမြို့နယ်တာဝန်ခံ ဒေါ်စိုးယုဆွေဦးဆောင်၍ ယနေ့နံနက်က လက်ကမ်းစာစောင်များ ဖြန့်ဝေကြသည်။ 

ကချင်ပြည်နယ်၊ ဖားကန့်ဒေသရှိ လုံးခင်း/ဖားကန့် ရတနာနယ်မြေအတွင်း ကျောက်စိမ်းတူးဖော်ရန် လက်လုပ်လက်စား လုပ်ကွက်(အသစ်) လုပ်ကိုင်လိုသူများအတွက် မတ် ၃ ရက်မှ ၁၃ ရက်အထိ မော်ဝမ်းရပ်ကွက်ရှိ စုပေါင်းရုံးအဝင် OSS (One Stop Service)ရုံး၌ လုပ်ကွက်လျှောက်လွှာများအား စိစစ်ရောင်းချပေးခဲ့ရာ ခွင့်ပြုလုပ်ကိုင်ခွင့်ပြုမည့် လုပ်ကွက် (၃၇၆)ကွက်အနက် လျှောက်လွှာပေါင်း (၃၃၂)စောင် ရောင်းချခဲ့ရသော်လည်း လျှောက်လွှာတင်သူ (၁၄၁)ဦးသာရှိခဲ့ကြောင်း သိရသည်။

ရာသီအလိုက် စိုက်ပျိုးရေးကို အဓိကအားထားလုပ်ကိုင်ကြသည့် တောင်သူများအနေဖြင့် သီးနှံပေါ်ချိန်တွင် ဈေးကွက်ကောင်းမွန်မှု မရှိသည့်အတွက် နှစ်စဉ်လိုလို အခက်အခဲများစွာဖြင့် ကြုံတွေ့နေကြရပြီး ယခုနှစ် နွေကာလ ပဲအမျိုးမျိုးနှင့် ပြောင်းဈေးကွက်ပေါ်ချိန်၌ ဈေးကွက်ကောင်းမွန်၍ စိုက်ပျိုးလုပ်ကိုင်ကြသည့် တောင်သူတိုင်းလိုလို အဆင်ပြေကြသည်ကို တွေ့ရှိရသည်။

ကိုရိုနာဗိုင်းရပ်စ်သည် ကမ္ဘာပေါ်တွင် နိုင်ငံပေါင်း (၁၅၀)ကျော်၌ ကူးစက်ပြန့်ပွားလျက်ရှိသော်လည်း မြန်မာနိုင်ငံတွင် အဆိုပါဗိုင်းရပ်စ်ပိုး ကူးစက်ခံရသူ မရှိသေးကြောင်း သိရသည်။

လှိုင်းဘွဲ ၁၅ မတ်

 

ဧရာဝတီတိုင်းဒေသကြီး လပွတ္တာခရိုင် လပွတ္တာမြို့နယ် ပြည်သူ့ကျန်းမာရေးဦးစီးဌာနနှင့် မြို့ပေါ်ရှိ လူမှုရေးအဖွဲ့အစည်းများစုပေါင်း၍ ကိုရိုနာဗိုင်းရပ်ရောဂါလက္ခဏာအကြောင်း အသိပညာပေး ဟောပြောခြင်းနှင့် လက်ကမ်းစာစောင်များကို လူစည်ကားရာ စျေးများ၊ ကားဂိတ်များ၊ သင်္ဘောဆိပ်နှင့် တစ်အိမ်တက်ဆင်း လက်ကမ်းစာစောင်များ ဖြန့်ဝေခြင်းများကို ယနေ့နံနက် ၉ နာရီမှစတင်၍ ဆောင်ရွက်ကြကြောင်း သိရသည်။