သန်လျင်ခရိုင်၊ သန်လျင်မြို့ မင်းကျောင်းပထမပြန် စာသင်တိုက်အတွင်း တည်ဆောက်ပြီးစီးသွားသော အဂ္ဂမဟာရွှေမေတ္တာ လေးထပ်ဆွမ်းစားကျောင်းတော်ကြီး ကျောင်းလွှတ်ပူဇာ ရေစက်ချမင်္ဂလာအခမ်းအနားကို ဖေဖော်ဝါရီ ၂၅ ရက်က အဆိုပါ ကျောင်းတိုက်၌ ကျင်းပခဲ့သည်။

တနင်္သာရီတိုင်းဒေသကြီး၊ မြိတ်မြို့ ကျက်သရေဆောင် လေးကျွန်ဆီမီးစေတီတော်တွင် (၂၁)ကြိမ်မြောက် ပရိယတ္တိ သာသနပါလ ဓမ္မာစရိယနှင့် ပထမပြန်စာမေးပွဲများကို စေတီတော် ဘဏ္ဍာတော်ထိန်း ဂေါပကအဖွဲ့မှ ကြီးမှူး၍ စေတီတော် ဗုဒ္ဓသာသနာ့ဗိမာန်၊ ရေကြည်တော်ဓမ္မာရုံနှင့် စာကြည့်တိုက်တို့တွင် ဖေဖော်ဝါရီ ၂၅ ရက်က စတင်ကျင်းပခဲ့ရာ ရဟန်း၊ သာမဏေနှင့် သီလရှင် အပါး ၂၉၀ ဖြေဆိုလျက်ရှိကြသည်။

ပဲခူးတိုင်းဒေသကြီး၊ တောင်ငူမြို့နယ်၌ နွေစပါးစိုက်ပျိုးခြင်း စွမ်းအားတိုးတက်မြင့်မားရေးအတွက် နွေစပါးစိုက်ပျိုးခြင်းကို ဆည်ရေ၊ လျှပ်စစ်ရေတင်စနစ်၊ ရေစုပ်စက်စနစ်နှင့် မြေအောက်ရေစနစ်တို့ဖြင့် ဆောင်ရွက်လျက်ရှိရာ ယခုနှစ် နွေစပါးဧက ၁၉၂၇၂ စိုက်ပျိုးရန်လျာထားပြီး မတ်လအတွင်း ဧက ၉၀၀၀ ကျော်စိုက်ပျိုးပြီးစီးကြောင်းနှင့် လျာထားစိုက်ဧကများ အားလုံးပြီးစီးအောင် ရည်မှန်းဆောင်ရွက်လျက်ရှိကြောင်း၊ စပါးအထွက်နှုန်းကောင်းမွန်သည့် ရက် ၉၀၊ နှံကောက်၊ ဆင်းသုခ စပါးမျိုးများစိုက်ပျိုးရန်လျာထားပြီး စိုက်ပျိုးနည်းစနစ်အရ ကောက်စိုက်စက်၊ မျိုးစေ့ချကိရိယာ၊ ပျိုးထောင်စိုက်ပျိုးနည်း စနစ်များဖြင့် စိုက်ပျိုးလျက်ရှိကြောင်း မြို့နယ်စိုက်ပျိုးရေးဦးစီးဌာနမှ သိရသည်။

ရှမ်းပြည်နယ်(အရှေ့ပိုင်း)၊ ကျိုင်းတုံခရိုင်၊ ကျိုင်းတုံမြို့နယ် တောင်ပေါ်ဒေသနှင့် မြေပြန့်ဒေသများရှိ ဒေသခံ တိုင်းရင်းသားများ စိုက်ပျိုးထားသည့် စတော်ဘယ်ရီသီးများ လှိုင်လှိုင်ပေါ်၍ ကျိုင်းတုံမြို့နှင့် ကျိုင်းတုံ-မိုင်းဖြတ် ပြည်ထောင်စုကားလမ်းမကြီး ဘေးဘယ်ညာတစ်လျှောက် ရောင်းချလျက်ရှိရာ ဈေးကောင်းရလျက်ရှိကြောင်း သိရသည်။