သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ ရှမ်းပြည်နယ်(အရှေ့ပိုင်း)၊ မိုင်းတုံခရိုင် ကွပ်ကဲမှုအောက်ရှိ မိုင်းတုံမြို့နယ် ကျေးလက်ဒေသ ဖွံ့ဖြိုးတိုးတက်ရေးဦးစီးဌာနက ၂၀၂၃-၂၀၂၄ ဘဏ္ဍာနှစ်တွင် ကျေးရွာတစ်ရွာလျှင် ကျေးရွာဖွံ့ဖြိုးတိုးတက်ရေး လုပ်ငန်းစီမံကိန်း (VDP) ပံ့ပိုးရန်ပုံငွေကျပ် (၁၅)သန်းစီဖြင့် မိုင်းတုံမြို့နယ်အတွင်းရှိ ကျေးရွာ (၁၄)ရွာ၌ ဒေသဖွံ့ဖြိုးရေးလုပ်ငန်းများကို ၂၀၂၃ ခုနှစ် စက်တင်ဘာလ ဒုတိယအပတ်မှ စတင်အကောင်အထည်ဖော် ဆောင်ရွင်ခဲ့ရာ ယခုအခါ လုပ်ငန်းများအားလုံး ရာနှုန်းပြည့် ဆောင်ရွက်ပြီးစီးနေပြီဖြစ်ကြောင်း အဆိုပါ ခရိုင်ဦးစီးဌာနမှ သိရသည်။

မကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု)မြို့နယ် လေးပင်ကျေးရွာဒေသထွက် ဆီးချိုသီးများ လှိုင်လှိုင်ထွက်ရှိလျက်ရှိပြီး ပေါ်ဦးပေါ်ဖျား ရာသီစာအဖြစ် ပြည်သူများက အကြိုက်တွေ့ ဝယ်ယူစားသုံးကြသဖြင့် အရောင်းအဝယ် ကောင်းမွန်လျက်ရှိကြောင်း မင်းဘူးမြို့ပေါ်ရှိ တစ်ပိုင်တစ်နိုင် ဆီးချိုသီးများ ဝယ်ယူရောင်းချသူများထံက သိရသည်။

ကရင်ပြည်နယ်၊ သံတောင်ကြီးမြို့နယ်၊ လိပ်သိုဒေသ အပူချိန်မြင့်သော ကျေးရွာများရှိ စိုက်ပျိုးရေးကို စိတ်ဝင်စားသော ဒေသခံအချို့မှာ ဂွေးချိုသီးပင်များကို အိမ်ခြံဝင်းအတွင်း စမ်းသပ်စိုက်ပျိုးလာရာမှ မိသားစုအပိုဝင်ငွေများ ရရှိလျက်ရှိကြောင်း သိရသည်။

ဧရာဝတီတိုင်းဒေသကြီး၊ လပွတ္တခရိုင်၊ မော်လမြိုင်ကျွန်းမြို့နယ်၊ အမှတ် (၃)ရပ်ကွက်၊ မဟာဗန္ဓုလ (၅)လမ်းတွင် ဇန်နဝါရီ ၂၈ ရက် ညနေ ၆ နာရီ ၅ မိနစ်ခန့်က အိမ်ပိုင်ရှင် ဦးထွန်းအောင်လင်း၏ နေအိမ်၌ ဖယောင်းတိုင်ဖြင့် ဘုရားမီးပူဇော်ရာမှ ဘုရားစင်မှတစ်ဆင့် မီးစတင်လောင်ကျွမ်းခဲ့ပြီး အနီးရှိ နေအိမ် (၂)လုံးအား ကူးစက်လောင်ကျွမ်းခဲ့ကြောင်း သိရသည်။