စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ သမဝါယမဦးစီးဌာနအောက်ရှိ ဌာန/ သမဝါယမတက္ကသိုလ်/သမဝါယမကောလိပ်တို့မှ ၂၀၁၉ ခုနှစ်၊ ဇန်နဝါရီလမှ ၂၀၂၀ ပြည့်နှစ်၊ နိုဝင်ဘာလအထိ သုတေသနသင်တန်း၊ မဟာဘွဲ့သင်တန်းနှင့် ပါရဂူဘွဲ့သင်တန်းပြီးဆုံး၍ ပြန်လည်ရောက်ရှိလာသည့် နိုင်ငံခြားပညာတော်သင်များ၏ အတွေ့အကြုံရှင်းလင်းပွဲကို ဒီဇင်ဘာ ၂၄ ရက် နံနက်ပိုင်းက  Virtual Platform ကတစ်ဆင့် ကျင်းပပြုလုပ်ခဲ့သည်။

ရှမ်းပြည်နယ် (တောင်ပိုင်း)၊ လင်းခေးခရိုင်၊ မိုင်းပန်မြို့နယ်တွင် ဘေးအန္တရာယ်ကင်းရှင်းသည့် စားဆီသန့်ကို ကျယ်ကျယ်ပြန့်ပြန့် အသုံးပြုနိုင်ရေးအတွက် ကုန်းကျိုင်းကျေးရွာအုပ်စု၊ တောင်သူဦးနေမျိုးအောင်၏ ယာမြေစိုက်ခင်းတွင် ရေဆင်း(၁) စပ်မျိုးနေကြာ (ဆီနေကြာ)အား စံပြကွက်အဖြစ် စိုက်ပျိုးရေးဦးစီးဌာန၏ ချမှတ်ထားသည့် စိုက်နည်းစနစ်အတိုင်း စိုက်ပျိုးအောင်မြင်စေရန်အတွက် မြို့နယ်စိုက်ပျိုးရေးဦးစီးဌာနမှ ကြိုးပမ်းဆောင်ရွက်ပေးခဲ့ကြောင်း သိရသည်။