ရခိုင်ပြည်နယ်ရှိ တိုက်ပွဲရှောင်စခန်းများနှင့် IDP စခန်းများတွင် နေထိုင်ကြသော အိမ်ထောင်စုများအား အစိုးရ၏ ကိုဗစ်-၁၉ စီးပွားရေးကုစားမှုအစီအစဉ် (CERP) အရ စားနပ်ရိက္ခာအတွက် ငွေကြေးထောက်ပံ့ခြင်း၊ လူမှုဝန်ထမ်း၊ ကယ်ဆယ်ရေးနှင့် ပြန်လည် နေရာချထားရေးဝန်ကြီးဌာန၏ ကိုဗစ်-၁၉ ရောဂါကာကွယ်ရေးဆိုင်ရာ ကြိုတင်ပြင်ဆင်မှု အစီအစဉ်အရ စခန်းများတွင် ပိုးတွေ့လူနာ/ သံသယလူနာများအား သီးခြားထားရှိရန် ယာယီ အဆောက်အဦများ ဆောက်လုပ်နိုင်ရေး ရန်ပုံငွေထောက်ပံ့ခြင်းတို့ကို ယနေ့နံနက်ပိုင်းက လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၌ အွန်လိုင်း စနစ်ဖြင့်ပြုလုပ်သည်။

မသန်စွမ်းသူများ၏ အခွင့်အရေးများဆိုင်ရာ ရန်ပုံငွေစီမံခန့်ခွဲရေးအဖွဲ့ လုပ်ငန်းညှိနှိုင်း အစည်းအဝေးကို ယနေ့မွန်းလွဲပိုင်းတွင် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန စုပေါင်းအစည်းအဝေးခန်းမ၌ ကျင်းပသည်။  

ပြည်ထောင်စုငြိမ်းချမ်းရေး ညီလာခံ-(၂၁)ရာစုပင်လုံ စတုတ္ထအစည်းအဝေး ညီလာခံ တတိယနေ့ကို ယနေ့ နံနက် ၁၀ နာရီတွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန(၂)၌ ကျင်းပရာ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာနဥက္ကဋ္ဌ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တက်ရောက်၍ ကျေးဇူးတင်စကားပြောကြားသည်။

ရခိုင်ပြည်နယ် စစ်တွေမြို့နယ်တွင် ကိုဗစ်-၁၉ ပြည်တွင်းကူးစက်မှုများရှိနေသဖြင့် ယခင်ပြေးဆွဲနေသော စစ်တွေ - အမ်း - မကွေး လေယာဉ်ခရီးစဉ်များအစား ရန်ကုန်-ညောင်ဦး - မကွေး ခရီးစဉ်အဖြစ် ပြောင်းလဲပျံသန်း ပြေးဆွဲ ပေးသွားမည်ဖြစ်ကြောင်း မြန်မာအမျိုးသားလေ ကြောင်းလိုင်း(MNA)၏ မကွေးဌာနေကိုယ်စားလှယ်ရုံးမှ သိရသည်။

သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ သစ်တောဦးစီးဌာန မှ ဖွင့်လှစ်ထားရှိသည့် တိရစ္ဆာန်ဥယျာဉ် (ရန်ကုန်)၊တိရစ္ဆာန်ဥယျာဉ်နှင့် ဆာဖာရီဥယျာဉ် (နေပြည်တော်)၊ တိရစ္ဆာန်ဥယျာဉ်(ရတနာပုံ)၊လှော်ကားဥယျာဉ်များရှိ တိရစ္ဆာန်များ၏ အစာ အတွက် ဒုတိယအကြိမ် လှူဒါန်းငွေပေးအပ်ပွဲကို ယနေ့မွန်းလွဲပိုင်းတွင် တိရစ္ဆာန်ဥယျာဉ် (ရန်ကုန်)၌ ကျင်းပသည်။ 

ဧရာဝတီတိုင်းဒေသကြီး ငါးလုပ်ငန်းဦးစီးဌာန၏ ကြီးကြပ်မှုဖြင့် ဖျာပုံခရိုင်၊ ဒေးဒရဲမြို့နယ် ငါးလုပ်ငန်း ဦးစီးဌာန၏ ၂၀၁၉-၂၀၂၀ ခုနှစ် စပါးခင်းများအတွင်း ငါးမျိုးစိုက်ထည့်ခြင်းအခမ်းအနားကို ယနေ့ နံနက် ၈ နာရီက ချောင်းဖျားကျေးရွာ ဦးထွန်းမြင့်အောင်၏ လယ်ကွင်း၌ ကျင်းပသည်။