စစ်ကိုင်းတိုင်းဒေသကြီး၊   ကန့်ဘလူခရိုင်၊ ကျွန်းလှမြို့တွင်  ယနေ့ နံနက်ပိုင်းက  ကိုဗစ်-၁၉ ရောဂါ  ကြိုတင်ကာကွယ်ရေးနှင့်   ထိန်းချုပ်နိုင်ရေးအတွက်    မြို့ပေါ်‌ဈေးများရှိ   ဈေးရောင်းချနေသူများကို  ပြည်တွင်းဖြစ် နှာခေါင်းစည်းများ အခမဲ့ဖြန့်ဝေပေးခဲ့ကြောင်းသိရသည်။  နှာခေါင်းစည်းများကို  စေတနာရှင်ပြည်သူများ၏   လှူဒါန်းမှုဖြင့်  ပိတ်စများဝယ်ယူကာ   စက်ချုပ်ဆိုင်များမှ  အခမဲ့လုပ်အားဒါနဖြင့် ချုပ်လုပ်ပေးခြင်းဖြစ်ကြောင်း ပိတောက်မြိုင်ရပ်ကွက်နေ ဒေါ်နွေးယုယုဇော်မှ ပြောကြားပါသည်။

မွန်ပြည်နယ်ဝန်ကြီးချုပ် ဒေါက်တာအေးဇံနှင့် အဖွဲ့သည် ယနေ့ နံနက် ၉ နာရီက မုဒုံမြို့နယ်အတွင်းရှိ ချောင်း၊ ရေမြောင်းများ ရေစီးရေလာကောင်းမွန်းစေရေ တူးဖော်ပြုပြင်နေမှုများကို ကြည့်ရှုစစ်ဆေးခဲ့ကြောင်း သိရသည်။

ရှမ်းပြည်နယ် (အရှေ့ပိုင်း) မက်မန်းမြို့နယ် ပညာရေးဦးစီးဌာနမှ ၂၀၁၉-၂၀၂၀ ဘဏ္ဍာရေးနှစ်အတွင်း ဆောင်ရွက် လျက်ရှိသော အ.ထ.ကကျောင်းဆောင်သစ် ၂ ထပ်ဆောင်နှင့် ပညာရေးဝန်ထမ်းအိမ်ရာ ၂ ခုကို ယနေ့ နံနက် ၁၀ နာရီက တာဝန်ရှိသူများက ကွင်းဆင်းစစ်ဆေးခဲ့ကြောင်း သိရသည်။

နယ်စပ်ရေးရာဝန်ကြီးဌာန၊ ပညာရေးနှင့် လေ့ကျင့်ရေးဦးစီးဌာန၊ ရှမ်းပြည်နယ် ပြည်နယ်ဦးစီးမှူး ဒုတိယညွှန်ကြားရေးမှူး ဦးရွှေဝင်းနှင့် တာဝန်ရှိသူများသည် ရှမ်းပြည်နယ်တောင်ပိုင်း အောင်ပန်းမြို့တွင် တည်ဆောက်လျက်ရှိသော နယ်စပ်ဒေသ တိုင်းရင်းသားလူငယ်များ စက်မှုလက်မှု ပညာသင်တန်းကျောင်း (အောင်ပန်း) ၏ တည်ဆောက်ရေးလုပ်ငန်းများ ဆောင်ရွက်ပြီးစီးမှု အခြေအနေအား မေ ၈ ရက်က ကြည့်ရှုစစ်ဆေးခဲ့ကြသည်။

မန္တလေးတိုင်းဒေသကြီး၊ ညောင်ဦးမြို့နယ်၊ လက်ပံပင်တဲတိုက်ရှိ ကျေးလက်နေပြည်သူများ သောက်သုံးရေ အခက်အခဲ ကြုံတွေ့နေရကြောင်း  သိရသဖြင့် ယနေ့  နံနက် ၉ နာရီက ပုဂံမြို့၊ ရတနာဘုံစံတောရ ဓမ္မရိပ်သာကျောင်း ဆရာတော် အရှင်သာဂရ ဦးစီးတည်ထောင်ထားသည့် ဖြူစင်မေတ္တာပရဟိတရေလှူအသင်းနှင့် သုမင်္ဂလာ ပရဟိတရေလှူအသင်းတို့မှ ပရဟိတ အသင်းသားများအဖွဲ့က ရေသယ်ယာဉ်တစ်စီးဖြင့် သောက်သုံးရေများ သွားရောက်လှူဒါန်းပေးခဲ့ကြောင်း သိရသည်။ 

ကရင်ပြည်နယ် ကော့ကရိတ်ခရိုင် ကြာအင်းဆိပ်ကြီးမြို့နယ်တွင် ကိုဗစ်-၁၉ ကူးစက်မြန်ရောဂါ ကြိုတင်ကာကွယ် ထိန်းချုပ်နိုင်ရေးနှင့် ကူးစက်ပြန့်ပွားမှု မရှိစေရေးအတွက် စဉ်ဆက်မပြတ် အရှိန်အဟုန်မြှင့် ဆောင်ရွက်လျက်ရှိပြီး မိုးဦးကာလတွင် ဖြစ်ပွားတက်သော သွေးလွန်တုပ်ကွေးရောဂါ ဖြစ်ပွားမှုမရှိစေရေးအတွက် ကြိုတင်ကာကွယ်ရေး အသိပညာပေးခြင်း လုပ်ငန်းများကို ဆောင်ရွက်လျက်ရှိကြောင်း သိရသည်။