နေပြည်တော်ကောင်စီ Coronavirus Disease 2019 (COVID- 19) ထိန်းချုပ်ရေးနှင့် အရေးပေါ်တုံ့ပြန်ရေးကော်မတီက ပြည်ထောင်စုနယ်မြေ၊ နေပြည်တော်အတွင်းရှိ  ပျဉ်းမနား၊ လယ်ဝေး၊  ဒက္ခိဏသီရိ၊ ဇမ္ဗူသီရိ၊  တပ်ကုန်း၊ ဇေယျာသီရိ၊ ပုဗ္ဗသီရိနှင့် ဥတ္တရသီရိမြို့နယ်များရှိ ပုံမှန်ဝင်ငွေမရှိသော အခြေခံလူတန်းစား အိမ်ထောင်စုများအတွက် ဧပြီ ၁၀ ရက်မှ စတင်၍ ဆန်၊ ဆီ၊ ကြက်သွန်နီ၊ ပဲ နှင့် ဆား စသည့် အခြေခံစားသောက်ကုန် (၅)မျိုးကို သက်ဆိုင်ရာ မြို့နယ်များမှတစ်ဆင့် ပေးဝေဖြန့်ခွဲလျက်ရှိသည်။

ရှမ်းပြည်နယ်အရှေ့ပိုင်း မိုင်းယုမြို့တွင် ပုံမှန်ဝင်ငွေမရှိသော အခြေခံလူတန်းစား အိမ်ထောင်စုများအတွက် နိုင်ငံတော်မှ ထောက်ပံ့သည့် အခြေခံစားသောက်ကုန် (၅)မျိုးထောက်ပံ့ပေးအပ်ခြင်းကို ယနေ့ နံနက် ၁၀ နာရီခွဲက မိုင်းယုမြို့ပေါ်နှင့် ရပ်ကွက်/ကျေးရွာများရှိ အိမ်ထောင်စုများထံသို့  အိမ်တိုင်ရာရောက် လိုက်လံထောက်ပံ့ပေးအပ်ခဲ့သည်။ 

စစ်ကိုင်းတိုင်းဒေသကြီး၊ ဝန်းသိုမြို့နယ်တွင် ပုံမှန်ဝင်ငွေမရှိသော အခြေခံလူတန်းစားများအတွက် နိုင်ငံတော်က ထောက်ပံ့ပေးသည့် အခြေခံစားသောက်ကုန်ပစ္စည်းများအား ဧပြီ ၁၀ ရက်မှစတင်၍ ရပ်ကွက်/ ကျေးရွာအုပ်စုများသို့ ဖြန့်ဝေပေးလျက်ရှိရာ အခြေခံလူတန်းစား အိမ်ထောင်စုပေါင်း ၁၃၈၆ စုအား ဖြန့်ဝေပေးပြီးဖြစ်ကြောင်း မြို့နယ် အုပ်ချုပ်ရေးမှုးရုံးမှ သိရသည်။

မန္တလေးမြို့တော် စည်ပင်သာယာရေးနယ်နိမိတ် အောင်မြေသာစံမြို့နယ်အတွင်းရှိ ဈေးများတွင် ယနေ့ နံနက် ၇ နာရီမှစ၍ ကိုဗစ်-၁၉ ရောဂါ ကာကွယ်တားဆီးရေးအတွက် Mask Campaign ပြုလုပ်ခြင်းကို လွှတ်တော်ကိုယ်စား လှယ်များ၊ မန္တလေးမြို့တော် စည်ပင်သာယာရေးကော်မတီမှ တာဝန်ရှိသူများ၊ အထွေထွေအုပ်ချုပ်ရေး ဦးစီးဌာန ဝန်ထမ်းများ၊ မြို့နယ် ကျန်းမာရေးဌာနနှင့် မီးသတ်ဦးစီးဌာနများမှ ဝန်ထမ်းများ၊ စေတနာရှင်ပြည်သူများ စုပေါင်း ဆောင်ရွက်ကြသည်။