ပြည်သူ့စစ်မှုထမ်းဥပဒေအား ကြိုဆိုထောက်ခံပွဲများကို ဖေဖော်ဝါရီ ၁၅ ရက် မွန်းလွဲပိုင်းက မင်္ဂလာဒုံမြို့နယ်၊ ထောက်ကြန့်စည်ပင်သာယာရေးရုံးဘေး(မြန္ဒာပန်းခြံ)၊ မြောက်ဥက္ကလာပမြို့နယ်၊ ဥက္ကလာသီရိပန်းခြံဝင်း၊ လှိုင်သာယာမြို့နယ်(အရှေ့ပိုင်း)၊ အောင်မြေသာယာအားကစားဝင်း၊ တွံတေး-ဒလ-လှိုင်သာယာ ဘုရားငုတ်တိုလမ်းဆုံ၊ သန်လျင်မြို့နယ် ငြိမ်းချမ်းကွင်းနှင့် ကျောက်တံတားမြို့နယ်၊ ဆူးလေယာဉ်ရပ်နားကွင်း၌ အသီးသီးကျင်းပပြုလုပ်ခဲ့သည်။

တနင်္သာရီတိုင်းဒေသကြီး ဝန်ကြီးချုပ် ဦးမြတ်ကိုသည် တိုင်းဒေသကြီး သယံဇာတရေးရာဝန်ကြီး၊ ဌာနဆိုင်ရာ တာဝန်ရှိသူများ နှင့်အတူ ဖေဖော်ဝါရီ ၁၅ ရက် နံနက်ပိုင်းက မြိတ်မြို့နယ်၊ စန္ဒဝတ်ကျေးရွာအုပ်စု၊ ကျွဲကူးကျေးရွာရှိ တောင်သူ ဦးချမ်းအေးလယ်တွင် ကျင်းပသည့် စပါးသီးနှံ၌ ကျရောက်သော ဖျက်ပိုးအန္တရာယ် ကာကွယ်နှိမ်နင်းရေး ကွင်းသရုပ်ပြပွဲ၊ နွေစပါးနှင့် ဆောင်းသီးနှံစိုက် အကျိုးဆောင်တောင်သူများအတွက် မြန်မာ့ရေနံနှင့် ဓာတုဗေဒလုပ်ငန်းမှ ထုတ်လုပ်သည့် ယူရီးယားဓာတ်မြေဩဇာနှင့် သဘာဝမြေဩဇာများ ထောက်ပံ့ပေးအပ်ပွဲသို့ တက်ရောက်ခဲ့သည်။

ရှမ်းပြည်နယ်(တောင်ပိုင်း)၊ ဓနုကိုယ်ပိုင်အုပ်ချုပ်ခွင့်ရဒေသရှိ ပင်းတယမြို့နယ်နှင့် ရွာငံမြို့နယ်တို့အတွက် နိုင်ငံ့စီးပွား မြှင့်တင်ရေးရန်ပုံငွေမှ မတည်ထောက်ပံ့ငွေ ပေးအပ်ပွဲကို ဖေဖော်ဝါရီ ၁၅ ရက် နံနက်ပိုင်းက ဓနုကိုယ်ပိုင်အုပ်ချုပ်ခွင့်ရဒေသ စီမံအုပ်ချုပ်ရေးအဖွဲ့ရုံး အစည်းအဝေးခန်းမ(၁)၌ ပြုလုပ်ခဲ့သည်။