(၆၈)နှစ်မြောက် ကယားပြည်နယ်နေ့ အထိမ်းအမှတ်၊ စတုတ္ထအကြိမ် မြန်မာ−ဂျပန် ချစ်ကြည်ရေး ချယ်ရီပန်းပင် စိုက်ပျိုးပွဲတော်အား ဂုဏ်ပြုကြိုဆိုခြင်း အထိမ်းအမှတ် ညစာစားပွဲအခမ်းအနားကို ဇန်နဝါရီ ၁၈ ရက် ည ၆ နာရီခွဲက လွိုင်ကော်မြို့၊ ဗုဒ္ဓဥယျာဉ်တော်အတွင်း၌ ကျင်းပခဲ့ပြီး စိန်နားပန်မီးပုံပျံနှင့် မီးပုံးပျံငယ်အလုံး(၂၀၀) လွှတ်တင်ခဲ့သည်။

ကချင်ပြည်နယ် ဖားကန့်မြို့နယ် ဆိပ်မူကျေးရွာအုပ်စု ကောင်ဆန်ကျေးရွာအနီးရှိ ကျောက်မျက်တူးဖော်ရေးလုပ်ကွက်၌ ဇန်နဝါရီ ၁၈ ရက် ညပိုင်းက မြေစာပုံနှစ်နေရာပြိုကျခဲ့၍ ဘက်ဟိုးနှစ်စီးနှင့် လူတစ်ဦးပျောက်ဆုံးနေကြောင်း ဖားကန့်မြို့နယ်ရဲတပ်ဖွဲ့မှူးရုံးမှ သိရသည်။

ကရင်ပြည်နယ်အစိုးရအဖွဲ့၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ အခြေခံပညာဦးစီးဌာနနှင့် ဖာပွန်ခရိုင်စီမံခန့်ခွဲမှုကော်မတီတို့ ပူးပေါင်းစီစဉ်ကျင်းပသော ကလေးစာပေပွဲတော် စာအုပ်စာပေပြပွဲနှင့် စာအုပ်ဈေးရောင်းပွဲကို ဇန်နဝါရီ ၁၈ ရက် နံနက် ၈ နာရီခွဲက ဖာပွန်မြို့ အခြေခံပညာအထက်တန်းကျောင်း၌ ကျင်းပခဲ့ပြီး ကရင်ပြည်နယ်ဝန်ကြီးချုပ် ဒေါ်နန်းခင်ထွေးမြင့် တက်ရောက်ဖွင့်လှစ်ပေးခဲ့သည်။

မီးဘေးအန္တရာယ် ကာကွယ်ရေးနှင့် လျှပ်စစ်အန္တရာယ်ကင်းဝေးစေရန် အသိပညာပေး ကွင်းဆင်းဆောင်ရွက်ခြင်းကို ယနေ့ နံနက် ၁၀ နာရီက စစ်ကိုင်းတိုင်းဒေသကြီး ထီးချိုင့်မြို့မဈေးအတွင်း ဆောင်ရွက်ခဲ့သည်။

မွန်ပြည်နယ် ချောင်းဆုံမြို့နယ်တွင် သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ မြို့နယ် သစ်တောဦးစီးဌာနနှင့် လွှတ်တော်ကိုယ်စားလှယ်တို့ ပူးပေါင်းပြီး နယ်စပ်ဖြတ်ကျော် မီးခိုးမြူငွေ့၊ တောမီးနှင့် အခြားမီးလောင်ကျွမ်းမှုများ ကာကွယ်ထိန်းချုပ်နိုင်ရေး အသိပညာပေးဟောပြောပွဲကို ယနေ့ နံနက်  ၁၀ နာရီက ကွမ်သဲကျေးရွာတွင် ပြုလုပ်ခဲ့သည်။

ဧရာဝတီတိုင်းဒေသကြီး ဒေးဒရဲမြို့၌ ဈေးကွက်အတွင်း ရောင်းချလျက်ရှိသည့် ဟင်းခတ်အချိုမှုန့်ထုပ်များတွင် အလေးချိန်ဖော်ပြချက်နှင့် ပါဝင်မှုအလေးချိန် ကိုက်ညီမှုရှိ/မရှိ ကွင်းဆင်းစစ်ဆေးခြင်းကို ယမန်နေ့နံနက်ပိုင်းက မြို့မဈေးအတွင်း စစ်ဆေးခဲ့သည်။