ရန်ကုန် ၁  မေ 

 

ကိုဗစ်-၁၉ ရောဂါ ကြိုတင်ကာကွယ်ရေး အသိပညာပေးခြင်းကို ယနေ့ မွန်းလွဲ ၁ နာရီခွဲက ရှမ်းပြည်နယ် (မြောက်ပိုင်း)၊ နမ္မတူမြို့နယ်၊  ဆိုင်ဂျာကျေးရွာ၌ ဆောင်ရွက်ခဲ့သည်။

မန္တလေးတိုင်းဒေသကြီး သာစည်မြို့နယ်တွင် ကိုဗစ်-၁၉ ရောဂါ ကြိုတင်ကာကွယ်ရေးနှင့် ပတ်သက်သော ထုတ်ပြန်ကြေညာ ချက်များကို လိုက်နာရေး၊ ကျန်းမာရေးနှင့် ဥပဒေဆိုင်ရာ အသိပညာပေးခြင်းနှင့် ပြန်လည်လျော်ဖွတ် အသုံးပြုနိုင်သော    ပိုးသတ်ပြီး Mask များ ဖြန့်ဝေခြင်းကို  ယနေ့ နံနက် ၁၀ နာရီက  မြို့အဝင်နေရာများနှင့် မြို့တွင်းတို့၌ ဆောင်ရွက်ခဲ့ ကြောင်း သိရသည်။

ရှမ်းပြည်နယ်(အရှေ့ပိုင်း) တာချီလိတ်မြို့တွင် ကိုဗစ်-၁၉ ဖြစ်ပွားနေချိန်ကာလအတွင်း စက်ရုံအလုပ်ရုံများအား ကျန်းမာရေးနှင့် အားကစားဝန်ကြီးဌာန၏ အကြံပြုချက်၊ သတ်မှတ်ချက်များနှင့်အညီ လိုက်နာဆောင်ရွက်ခြင်း ရှိ မရှိ စစ်ဆေးမှုကို ဧပြီ ၂၉ ရက်က ကွင်းဆင်းစစ်ဆေးခဲ့ကြောင်း သိရသည်။

ရှမ်းပြည်နယ်(မြောက်ပိုင်း)၊ ကွမ်းလုံမြို့နယ်တွင် ဖွင့်လှစ်ထားသော ကိုဗစ်-၁၉ ရောဂါ ကာကွယ်ထိန်းချုပ်ရေး ယာယီစောင့်ကြည့်ရေးစင်တာ၌ Quarantine (၂၁)ရက် ပြည့်မြောက်ပြီးဖြစ်သည့် နေရပ်ပြန်ပြည်သူ(၈၈)ဦးအား နေရပ်အသီးသီးသို့ ယနေ့ နံနက် ၇ နာရီက ပြန်လည်ပို့ဆောင်ပေးခဲ့ကြောင်း သိရသည်။