ရန်ကုန်မြောက်ပိုင်းခရိုင်၊ အင်းစိန်မြို့နယ်၌ ကိုရိုနာဗိုင်းရပ်(စ်)ရောဂါ ကူးစက်ပျံ့နှံ့မှု မရှိစေရန် ရည်ရွယ်၍ အင်းစိန်မြို့နယ်အတွင်း ကိုဗစ်-၁၉ရောဂါပိုး တွေ့ရှိခဲ့သူ၏ နေထိုင်ခဲ့သည့် လမ်းများအား လိုက်လံကြည့်ရှုစစ်ဆေးခြင်းကို ယမန်နေ့ နံနက် ၁၀  နာရီအချိန်က ကြည့်ရှုစစ်ဆေးခဲ့သည်။

စစ်ကိုင်းတိုင်းဒေသကြီး ကန့်ဘလူမြို့နယ်တွင် ကိုဗစ်-၁၉ ကြိုတင်ကာကွယ်ထိန်းချုပ်ရေး လုပ်ငန်းများကို အရှိန်အဟုန်မြှင့်တင် ဆောင်ရွက်လျက်ရှိရာ ကန့်ဘလူမြို့နယ် လျှပ်စစ်အင်ဂျင်နီယာရုံး တွင်လည်း လျှပ်စစ်ဓာတ်အားသုံးစွဲသူ မိဘပြည်သူများ လျှပ်စစ်ဓာတ်အားခငွေ လာရောက်ပေးသွင်းရာတွင် လူစုလူဝေးမဖြစ်ပေါ်စေရေးအတွက် ပြင်ဆင်ဆောင်ရွက်ထားကြောင်း သိရသည်။

ဧရာဝတီတိုင်းဒေသကြီး ကြံခင်းမြို့နယ် မြို့မဈေးနှင့် ဘက်ရဲဈေးတို့ရှိ ပျံကျဈေးသည်များသည် ယာယီဈေးဖွင့်လှစ်ထားသော သတ်မှတ်နေရာများတွင် ယနေ့နံနက် ၅ နာရီက စတင်ဖွင့်လှစ် ရောင်းချလျက်ရှိကြောင်း သိရသည်။

ဂန့်ဂေါခရိုင်၊ ဆောမြို့နယ်တွင် ကိုဗစ်-၁၉ ရောဂါကူးစက်ပျံ့နှံ့ခြင်းမှ ကာကွယ်ထိန်းချုပ်နိုင်ရန် ရည်ရွယ်၍ မကွေးတိုင်းဒေသကြီး အစိုးရအဖွဲ့က ထပ်မံ၍ ရက်တိုးမြှင့်သတ်မှတ် ထုတ်ပြန်ထားသည့် ပြည်သူများသို့ ထုတ်ပြန်ကြေညာသည့် ပန်ကြားချက်များနှင့် မြို့နယ်အထွေထွေအုပ်ချုပ်ရေးဦးစီးဌာနမှ ထုတ်ပြန်ထားသည့် အမိန့်ကြေညာစာအား ပြည်သူများ ကျယ်ကျယ်ပြန့်ပြန့် သိရှိလိုက်နာနိုင်စေရန်အတွက် ဧပြီ ၁၉ ရက် ညနေ ၄ နာရီက ရပ်ကွက်များအတွင်း အသံချဲ့စက်ဖြင့် လှည့်လည်အသိပညာပေး ကြော်ငြာခြင်းကို ဆောင်ရွက်ခဲ့ကြသည်။