မန္တလေးတိုင်းဒေသကြီး၊ ကျောက်ပန်းတောင်းမြို့နယ်တွင် မိုးဦးကာလ မိုးကောင်မွန်စွာရရှိသဖြင့် မြို့နယ်အတွင်း စိုက်ပျိုးထားရှိသည့် မြေပဲနှင့် နှမ်းများ အောင်မြင်ဖြစ်ထွန်းလျှက်ရှိပြီး၊ ပေါင်းနှုတ်ခြင်း ဆေးဖြန်းခြင်းလုပ်ငန်းများ ဆောင်ရွက်လျှက်ရှိသည်။ စိုက်ပျိုးရေးသွင်းအားစုများ ဈေးကြီးမြင့်လာမှုကြောင့် ယခုနှစ်သီးနှံပေါ်ချိန်တွင် ယမန်နှစ်ကကဲ့သို့ ဈေးကောင်းရရှိရေး တောင်သူများ မျှော်လင့်နေကြကြောင်းသိရသည်။

ပဲခူးတိုင်းဒေသကြီး၊ ကျောက်တံခါးမြို့နယ်တွင် ကိုရီးယားသစ်တောဌာနနှင့် မြန်မာနိုင်ငံ သစ်တောဦးစီးဌာနတို့ ပူးပေါင်းဆောင်ရွက်သည့် FD-KFS REDD+ စီမံကိန်းနှင့် ကျောက်တံခါးမြို့နယ် သစ်တောဦးစီးဌာနတို့ ပူးပေါင်းဆောင်ရွက်သည့် မိုးရာသီ သစ်ပင်စိုက်ပျိုးပွဲတော်အား ယမန်နေ့က ကြာအင်းကုန်းကျေးရွာအုပ်စု၊ ကြာပင်အိုင်ကျေးရွာ ရန်ကုန် - မန္တလေးအမြန်လမ်း၊ မိုင်တိုင်အမှတ် (၁၀၃) မိုင် (၆) ဖာလုံအနီးတွင် ကျင်းပဆောင်ရွက်ခဲ့သည်။

မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့၌ နယ်လှည့်ဈေးရောင်းချသူများအဖွဲ့က ဦးဆောင် ကျင်းပသည့် စုပေါင်းဈေးရောင်းပွဲတော်ကို ဇွန်လ ၁၇ ရက် ညနေပိုင်းမှစတင်ပြီး မင်းဘူးမြို့ အမှတ် (၄) ရပ်ကွက်ရှိ ဗြဟ္မစိုရ်လူမှုကူညီရေးအသင်း ရုံးဝင်းအတွင်း၌ ကျင်းပပြုလုပ်လျက်ရှိရာ ဈေးရောင်းပွဲတော် ဒုတိယနေ့အဖြစ် ဇွန်လ ၁၈ ရက်နေ့ ညပိုင်းက လာရောက်လည်ပတ်သူများဖြင့် အထူးစည်ကားခဲ့ကြောင်း သိရသည်။

ဧရာဝတီတိုင်းဒေသကြီး၊ ဖျာပုံခရိုင်၊ ဘိုကလေးမြို့နယ်ရှိ ကုန်စုံဆိုင်များတွင် မြန်မာဘာသာဖြင့် ကုန်အညွှန်းအမှတ်တံဆိပ် ရိုက်နှိပ်ဖော်ပြထားခြင်း မရှိသောကုန်စည်များ၊ သက်ဆိုင်ရာမှ တားမြစ်ထားသော ကုန်စည်များ၊ တရားမဝင် ကုန်စည်များ ရောင်းဝယ်ဖောက်ကား သိုလှောင်ထားခြင်း ရှိ/မရှိကို ယနေ့ နံနက် ၁၀ နာရီ၌ အဖွဲ့စုံဖြင့် ပူးပေါင်းစစ်ဆေးခဲ့ကြသည်။

မကွေးတိုင်းဒေသကြီး၊ ပတ်ဝန်းကျင်ထိန်းသိမ်းရေး ဦးစီးဌာနနှင့် ဟိုတယ်နှင့်ခရီးသွား ညွှန်ကြားမှု ဦးစီးဌာနတို့ ပူးပေါင်း၍ ကျောင်းသား၊ ကျောင်းသူလေးများ သဘာဝပတ်ဝန်းကျင်ကို ချစ်ခင်မြတ်နိုးပြီး မိမိတို့သုံးဆွဲထားသော အမှိုက်များကို စနစ်တကျခွဲခြားစွန့်ပစ်ခြင်းနှင့် သိမ်းဆည်းခြင်းဆိုင်ရာ အလေ့အကျင့်ကောင်းများ ဆောင်ရွက်တတ်စေရန် အသိပညာပေးလှုပ်ရှားမှု အစီအစဉ်ကို ယနေ့နံနက် ၉ နာရီက မင်းဘူးခရိုင်၊ မင်းဘူးမြို့၊ အ.ထ.က (ခွဲ) မြို့မကျောင်း၌ ကျင်းပပြုလုပ်ခဲ့ကြောင်း သိရသည်။