နေပြည်တော်၊ ဇန်နဝါရီ ၁

 

နေပြည်တော်၊ ဇန်နဝါရီ ၁

ရခိုင်ပြည်နယ်၊ သံတွဲမြို့၌ ခရိုင်စီမံအုပ်ချုပ်ရေးအဖွဲ့၏ ဦးဆောင်မှုဖြင့် ဇန်နဝါရီ ၁ ရက် နံနက်ပိုင်းမှစတင်၍ အစိုးရ စက်မှုလက်မှုသိပ္ပံ ကျောင်းဝင်းအတွင်း၌ ဝန်ထမ်းမိသားစုများအား ကြက်ဥနှင့် အသားများကို သံတွဲမြို့မဈေးမှ အသားဆိုင်များက ဈေးနှုန်းသက်သာစွာ ရောင်းချပေးခဲ့သည်။

နေပြည်တော်၊ ဥတ္တရခရိုင်၊ တပ်ကုန်းမြို့နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာနတွင် (၇၆)နှစ်မြောက် လွတ်လပ်ရေးနေ့ အထိမ်းအမှတ် ပန်းချီ၊ ကဗျာရွတ်၊ ပုံပြောနှင့် စာဖတ်စွမ်းရည်ပြိုင်ပွဲများနှင့် နံရံကပ်စာစောင်၊ သုတရသ စာအုပ်များပြသခြင်းကို ဇန်နဝါရီ ၁ ရက် နံနက်ပိုင်းက အဆိုပါဦးစီးဌာနရှိ Community Centre ခန်းမတွင် ကျင်းပသည်။ 

မန္တလေးတိုင်းဒေသကြီး၊ ညောင်ဦးခရိုင် မွေးမြူရေးနှင့် ကုသရေးဦးစီးဌာနမှ တိုင်းရင်းကြက်မွေးမြူရေး၊ သုတေသနနှင့် မျိုးထိန်းမျိုးပွားခြံအဖြစ် အသုံးပြုထားသည့် မြေနေရာအတွက် ညောင်ဦးမြို့နယ် တောင်သူများ လက်ဝယ်သို့ မြေယာလျော်ကြေးငွေ ပေးအပ်ပွဲကို ဇန်နဝါရီ ၁ ရက် နံနက်ပိုင်းက ညောင်ဦးမြို့နယ် အထွေထွေအုပ်ချုပ်ရေးဦးစီးဌာန၊ မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌရုံးခန်းတွင် ပြုလုပ်ခဲ့သည်။