စစ်ကိုင်းတိုင်းဒေသကြီး၊ ကသာမြို့နယ်တွင် အသက်(၈၅)နှစ်အထက် သက်ကြီးဘိုးဘွား ၄၆၈ ဦးရှိပြီး အဆိုပါ သက်ကြီးဘိုးဘွားများအား လူမှုဝန်ထမ်းဦးစီးဌာန၏ ၂၀၁၉-၂၀၂၀ ဘဏ္ဍာရေးနှစ်၊ တတိယ သုံးလပတ်(ဧပြီ၊ မေ၊ ဇွန်)အတွက် လူမှုရေးပင်စင် ထောက်ပံ့ငွေနှင့် လူမှုဝန်ထမ်းဦးစီးဌာနနှင့် အသက်မွေးဝမ်းကျောင်းနှင့် စားနပ်ရိက္ခာဖူလုံရေး ရန်ပုံငွေအဖွဲ့တို့ ပူးပေါင်းထောက်ပံ့သော ကိုဗစ်-၁၉ ကူးစက် ရောဂါဖြစ်ပွားနေသည့်ကာလ ထပ်ဆောင်းထောက်ပံ့ငွေတို့ကို တာဝန်ရှိသူများက ၎င်းတို့၏ အိမ်အရောက် သွားရောက်ထောက်ပံ့ ပေးအပ်ပြီးဖြစ်ကြောင်း ကသာခရိုင် လူမှုဝန်ထမ်းဦးစီးဌာနမှ သိရသည်။

မကွေးတိုင်းဒေသကြီး မင်းဘူးခရိုင် စေတုတ္တရာမြို့နယ် အားကစားနှင့် ကာယပညာဦးစီးဌာနမှ ယနေ့နံနက် (၈) နာရီအချိန်က  စေတုတ္တရာမြို့ အ.ထ.က ကျောင်းတွင် Grade-10 သင်ရိုးသစ်သင်တန်း တက်ရောက်နေသော ဆရာ/ဆရာမများအား ကိုယ်လက်လှုပ်ရှားဆေးတစ်ပါး(EIM) အစီအစဉ်အရ (MFD)အက သရုပ်ပြဆောင်ရွက်ပေးခဲ့ကြောင်း သိရသည်။ 

မိတ္ထီလာမြို့နယ် အတွင်းရှိ အခြေခံပညာ အထက်တန်းအဆင့် ကျောင်းများအား ကျန်းမာရေးနှင့် အားကစားဝန်ကြီးဌာန၏ ကိုဗစ်-၁၉ ရောဂါ ကာကွယ်ရေး လမ်းညွှန်ချက်များ နှင့်အညီ ဖွင့်လှစ်နိုင်ရေးအတွက် ပြင်ဆင်ဆောင်ရွက်လျက်ရှိကြောင်း မြို့နယ်ပညာရေးမှူး ဦးဝင်းဗိုလ် ထံမှ သိရသည် ။

မကွေးတိုင်းဒေသကြီး  ပွင့်ဖြူမြို့နယ် အမှတ်(၄၆) စက်မှုလယ်ယာစခန်းမှ မြို့နယ်အတွင်းရှိ စပါးစိုက်ပျိုး တောင်သူများ ဆန်စပါးအရည်အသွေး ကောင်းမွန်စေရန် ၊ စပါးစိုထိုင်းမှုကြောင့် လေလွင့်ဆုံးရှုံးမှုများ မဖြစ်ပေါ်စေရန်နှင့် ကုန်ကျစရိတ် သက်သာစွာဖြင့် စပါးအခြောက်ခံခြင်းများ ပြုလုပ်ဆောင်ရွက်နိုင်စေရန် ရည်ရွယ်၍ စပါးအခြောက်ခံစက်ဖြင့် တောင်သူများအား စပါးအခြောက်ခံခြင်းလုပ်ငန်း ဝန်ဆောင်မှုပြုပေးလျက်ရှိကြောင်း ပွင့်ဖြူမြို့နယ် အမှတ်(၄၆) စက်မှု လယ်ယာစခန်းရုံးမှ သိရသည်။

ဂန့်ဂေါမြို့နယ်အတွင်း မိုးရွာသွန်းမှု လျော့နည်းပြီး မိုးခေါင်နေသော်လည်း နည်းလမ်းမျိုးစုံ အသုံးပြု၍ မိုးစပါးများကို ကြဲပက်စိုက်ပျိုးခြင်း၊ မျိုးစေ့ချကိရိယာဖြင့် စိုက်ပျိုးခြင်း၊ ရေတင်စိုက်ပျိုးခြင်း စသည်ဖြင့် ဆက်လက်စိုက်ပျိုးလျှက်ရှိကြောင်း သိရသည်။

ရန်ကုန်တိုင်းဒေသကြီး၊ အရှေ့ပိုင်းခရိုင်၊ ဒဂုံမြို့သစ်(မြောက်ပိုင်း)မြို့နယ်တွင် မြို့နယ်အတွင်းရှိ အသက်(၂) နှစ်အောက် ကလေးငယ်များနှင့် ကိုယ်ဝန်ဆောင်မိခင်များကို ပုံမှန်ကာကွယ် ဆေးများ ထိုးနှံတိုက်ကျွေးပေးခြင်း လုပ်ငန်းများကို (၂၉) ရပ်ကွက် အုပ်ချုပ်ရေးမှူးရုံးတွင် ယနေ့နံနက် ၈ နာရီက ဆောင်ရွက်ခဲ့ကြောင်း သိရသည်။