တနင်္သာရီတိုင်းဒေသကြီး၊ ကျွန်းစုမြို့နယ်တွင် ကရုဏာနာရေးကူညီမှုအသင်း၊ ကြက်ခြေနီအသင်းနှင့် ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့ ပူးပေါင်း၍ ကိုဗစ်-၁၉ ရောဂါ ကြိုတင်၊ ကာကွယ်၊တားဆီးရေး အတွက် အသိပညာပေးလုပ်ငန်းများကို ယမန်နေ့ နံနက်ပိုင်းက ကျေးရွာ(၆)ရွာတွင် ဆောင်ရွက်ခဲ့ကြောင်း သိရသည်။

ဖလမ်းမြို့၊ အမှတ် (၁၀၃) ယာဉ်ထိန်းရဲတပ်ဖွဲ့ဝင်များက ကိုဗစ်-၁၉ ရောဂါ ကူးစက်ပြန့်ပွားမှု ကာကွယ်နိုင်ရေး ယနေ့ နံနက်ပိုင်းက ဖလမ်းမြို့၊ ထီးရိပ်လမ်းဆုံ၌ နှာခေါင်းစည်း ( Mask ) များ အခမဲ့ဖြန့်ဝေပေးခဲ့ကြောင်း သိရသည်။

ကိုဗစ် - ၁၉ ရောဂါကြိုတင်ကာကွယ်ရေး ထိန်းချုပ်ရေးကာလတွင် ဈေးသည်များနှင့် ဈေးဝယ်သူများ နီးကပ်စွာ ဝယ်ယူမှု မရှိစေရန်နှင့် လူစုလူဝေး မဖြစ်စေရန်အတွက် ဓနုကိုယ်ပိုင် အုပ်ချုပ်ခွင့်ရဒေသ ပင်းတယမြို့ ရွှေဉမင်ဘုရားတောင်ခြေ၌  ယာယီဈေးအဖြစ် ဖွင့်လှစ်ထားမှုအား ဒေသဉီးစီးအဖွဲ့ဥက္ကဋ္ဌ ဦးအာကာလင်းနှင့် အဖွဲ့ဝင်များ၊ သက်ဆိုင်ရာ တာဝန်ရှိသူများများက ယမန်နေ့က သွားရောက်ကြည့်ရှုခဲ့ကြကြောင်း သိရသည်။

မန္တလေးမြို့ရှိ ကွမ်းဈေးကွက်တွင် သင်္ကြန်အပြီး မိုးကြိုကာလရာသီ၌ မိုးခေါင်မှုကြောင့် အထွက်နှုန်းနည်းပါးကာ ကွမ်းရွက်ဈေးနှုန်းများ တရိပ်ရိပ်မြင့်တက်လာကြောင်း ကွမ်းဖြန့်ချိရေးဆိုင်များမှ သိရသည်။

ပခုက္ကူမြို့နယ် လျှပ်စစ်အင်ဂျင်နီယာရုံးသို့ မီတာခပေးသွင်းရန် လာရောက်ကြသည့် ပြည်သူများအတွက် လတ်တလော အသက်ရှုလမ်းကြောင်းဆိုင်ရာ ကိုရိုနာဗိုင်းရပ်စ်ရောဂါ ကြိုတင်ကာကွယ်ရေး စနစ်တကျ ဆောင်ရွက်ထားကြောင်း သိရသည်။