တရုတ်ပြည်သူ့သမ္မတနိုင်ငံ၊ ဝူဟန်မြို့ရှိ မြန်မာပညာသင် (၆၃) ဦးအား မြန်မာနိုင်ငံမှ အထူးလေယာဉ်ဖြင့် ဖေဖော်ဝါရီ ၂ ရက်က သွားရောက်ခေါ်ဆောင်ရာတွင် ကျန်ရှိခဲ့သော မြန်မာ ပညာသင် ကျောင်းသူကျောင်းသား (၂)ဦးအား အိန္ဒိယနိုင်ငံအစိုးရ၏အကူအညီဖြင့် ဖေဖော်ဝါရီ ၂၇ ရက် တွင် နယူးဒေလီမြို့သို့ ပြန်လည်ခေါ်ဆောင်ခဲ့ပြီး နယူးဒေလီမြို့တွင် စောင့်ကြည့်ကာလ (၁၄) ရက် နေထိုင်ခဲ့ကြောင်း သိရသည်။

စစ်ကိုင်းတိုင်းဒေသကြီး၊ ဝန်းသိုမြို့နယ်တွင် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ အကောင် အထည်ဖော်ဆောင်ရွက်နေသည့် ကျေးလက်ဒေသရေရရှိရေးလုပ်ငန်းများနှင့် ကျေးရွာဖွံ့ဖြိုးရေး စီမံကိန်းလုပ်ငန်းများ ဆောင်ရွက်နေမှုများအား ယနေ့နံနက် ၈ နာရီမှစ၍ မြို့နယ်ဦးစီးမှူး ဦးမြတ်မျိုးထွန်းနှင့် တာဝန်ရှိသူများက ကွင်းဆင်းစစ်ဆေးခဲ့ကြသည်။

စစ်ကိုင်းတိုင်းဒေသကြီး၊ မုံရွာမြို့နယ် ကြာပိုင်ကျေးရွာတွင် စိုက်ပျိုးလျက်ရှိသော အထွက်နှုန်း ကောင်း ယိုးဒယားပိန္နဲမျိုးများမှာ  စိန်စံတော် အမွှာကြီး (ငါးမွှာတစ်ကီလို)၊ ပိန္နဲသုံးရာသီ (တစ်နှစ်လုံး သီး)၊  ပိန္နဲသူရိယအနီရောင်၊ ပိန္နဲအလုံးကြီး အမွှာကြီး ( တစ်နှစ်လုံးသီး) တို့ကို  ကိုင်းထပ်ဆက်ပျိုး သော နည်းပညာဖြင့် စိုက်ပျိုးလျက်ရှိပါကြောင်း၊ ပိန္နဲမျိုးအားလုံးသည် အိမ်မာမျိုးများဖြစ်၍ အသား ကြွပ်ချိုပြီး အရသာအထူးကောင်းမွန်သောကြောင့် စီးပွားဖြစ်စိုက်ပျိုးရန်သင့်တော်သည့် အပင်မျိုးဖြစ်ပါကြောင်း စိုက်ပျိုးရေးပညာရှင် ဦးမျိုးတင့်အောင်မှ ပြောကြားသည်။ 

သနပ်ပင်မြို့နယ်အတွင်းရှိ ကျေးရွာ ၂၀ တွင်  ကျေးရွာဖွံ့ဖြိုးရေးရန်ပုံငွေဖြင့် ကျေးရွာလမ်းအဆင့် မြှင့်တင်ခြင်းလုပ်ငန်းများနှင့် သောက်သုံးရေရရှိရေးလုပ်ငန်းများ ဆောင်ရွက်လျက်ရှိကြောင်း  သိရသည်။

ရန်ကုန်တိုင်းဒေသကြီး ဒလမြို့နယ် ရခိုင်ချောင်ကျေးရွာ၌ နှစ်စဉ်နွေရာသီကာလအတွင်း သောက်သုံးရေကန်များ ခန်းခြောက်လျက်ရှိရာ ဒေသခံပြည်သူများ ရေရှားပါးမှုမှ ကင်းဝေးစေရေးနှင့် သောက်သုံးရေ ဖူလုံစွာရရှိစေရေးအတွက် ရည်ရွယ်၍ မြို့နယ်အထွေထွေအုပ်ချုပ်ရေးဦးစီးဌာန မြို့နယ်အုပ်ချုပ်ရေးမှူး ဦးယဉ်ထွေး၏ မတည်လှူဒါန်းမှု၊ ဒေသခံ ကျေးရွာသူ၊ ကျေးရွာသားများမှ စုပေါင်းလှူဒါန်းငွေကျပ် သိန်း ၁၃၀ ဖြင့် ကျေးရွာတောင်ဘက်ခြမ်း၌ သောက်သုံးရေကန်ကြီးအား ပြန်လည်တူးဖော် ဆောင်ရွက်ခဲ့ကြောင်းသိရသည်။

မကွေးတိုင်းဒေသကြီး  မင်းဘူးခရိုင် စေတုတ္တရာမြို့နယ် တယ်ဇားအုပ်စုရှိ ကျေးရွာများ ကွင်းဆင်းတီဘီရှာဖွေဖော်ထုတ်ကုသပေးခြင်းကို တယ်ဇားကျေးရွာတွင်  ယနေ့နံနက် ၈ နာရီ အချိန်က အခမဲ့ကုသခြင်းများ ဆောင်ရွက်ပေးခဲ့ကြောင်း သိရသည်။