ကမ္ဘာ့ရှေးဟောင်းအမွေအနှစ်စာရင်းဝင် ပုဂံညောင်ဦး ရှေးဟောင်းယဉ်ကျေးမှုနယ်မြေဒေသအား အစဉ်အမြဲ သန့်ရှင်းသာယာလှပစေရန်နှင့် ပြည်သူများ ပလပ်စတစ်အမှိုက်များစွန့်ပစ်ရာ၌ စနစ်တကျ စွန့်ပစ်သည့်အလေ့အကျင့်များ ရရှိစေရန် ရည်ရွယ်ကာ ညောင်ဦးခရိုင်အထွေထွေအုပ်ချုပ်ရေးဦးစီးဌာနနှင့် Bagan Plastic Campaign အဖွဲ့ တို့ ပူးပေါင်းပြီး အပတ်စဉ် စနေနေ့တိုင်း စဉ်ဆက်မပြတ် စုပေါင်းအမှိုက်ကောက်ယူရှင်းလင်းရေးလုပ်ငန်းများ ကွင်းဆင်းဆောင်ရွက်လျက်ရှိရာ ဖေဖော်ဝါရီ ၈ ရက်(စနေနေ့)၊ ယနေ့ နံနက်ပိုင်းက ပုဂံမြို့သစ်မှ ရွှေဆံတော်ဘုရားသွားရာ လမ်းဘေး(ဝဲ၊ ယာ)တစ်လျှောက်ရှိ စွန့်ပစ်ပလပ်စတစ်အမှိုက် ကောက်ယူရှင်းလင်းရေးလုပ်ငန်းများ ကွင်းဆင်းဆောင်ရွက်ခဲ့ကြောင်း သိရသည်။ 

ကျန်းမာရေးနှင့်အားကစားဝန်ကြီးဌာန၊ ကျန်းမာရေးလူ့စွမ်းအားအရင်းအမြစ်ဦးစီးဌာန သူနာပြုတက္ကသိုလ် (မန္တလေး) ၏ (၁၉)ကြိမ်မြောက်ဘွဲ့နှင်းသဘင် အခမ်းအနားကို မန္တလေးမြို့၊ ချမ်းမြသာစည်မြို့နယ်ရှိ အဆိုပါ တက္ကသိုလ် ဘွဲ့နှင်းခန်းမတွင် ဖေဖော်ဝါရီ ၉ ရက် နံနက် ၉ နာရီ တွင် ကျင်းပပြုလုပ်သည်။

ရှမ်းပြည်နယ်(အရှေ့ပိုင်း)၏ အထင်ကရ ကျိုင်းတုံမြို့ရှိ ပါလျှန်မြို့ရိုးတံခါး တည်တံ့ခိုင်မြဲရေးနှင့် တံခါးပတ်ဝန်းကျင် သာယာလှပရေး လုပ်ငန်းများကို  ဆောင်ရွက်လျက်ရှိရာ  ငွေကြေးဖြင့်၊ လုပ်အားဖြင့် ပါဝင်ကြသူများအား ဂုဏ်ပြုမှတ်တမ်းလွှာပေးအပ်ခြင်းကို ယနေ့နံနက် ၇ နာရီက လွိုင်မွေလမ်းဆုံရှိ အဆိုပါတံခါးအနီးတွင် ပြုလုပ်သည်။

ဧရာဝတီတိုင်းဒေသကြီး၊ ပုသိမ်ခရိုင်၊ ကျောင်းကုန်းမြို့နယ်၊ အမှတ်(၄)ရပ်ကွက်၊မင်းလမ်း ဓမ္မစာဂီအုတ်တွင်း ကျောင်းတိုက်၌ မြို့နယ်လုံးဆိုင်ရာ ဓမ္မစကူးလ်ကျောင်းတော်သစ်ကြီး ပန္နက်တော်တင် မင်္ဂလာအခမ်းအနားကို ယနေ့ နံနက် ၇ နာရီ ၄၅ မိနစ်က ကျင်းပခဲ့သည်။

စစ်ကိုင်းတိုင်းဒေသကြီး၊ ရွှေဘိုခရိုင်၊ ခင်ဦးမြို့၊ အောင်မင်္ဂလာရပ်၌ ဖေဖော်ဝါရီလ ၈ ရက် (တပို့တွဲလပြည့်နေ့) နှစ်စဉ် မင်္ဂလာရာန်အောင်ဓာတ်ပေါင်းစုစေတီကြီး ဗုဒ္ဓပူဇနိယပွဲတော်တွင် နွားဒုန်းပြိုင်ပွဲနှင့် မြင်းဒုန်းပြိုင်ပွဲ ဗိုလ်လုပွဲကို ဖေဖော်ဝါရီလ ၇ ရက် ညနေ ၃ နာရီက ကျင်းပပြုလုပ်သည်။