ဧရာဝတီတိုင်းဒေသကြီး မြောင်းမြခရိုင် အိမ်မဲမြို့နယ် ပြည်သူ့ဆေးရုံသို စေတနာရှင်အလှူရှင်များက မတ် ၂၅ ရက် နံနက် ၉ နာရီက အောက်စီဂျင်အိုးများ လာရောက်လှူဒါန်းခဲ့ကြောင်း သိရသည်။

COVID-19 ရောဂါနှင့်ပတ်သက်၍ ထိန်းချုပ်ကုသရေးဌာနများအဖြစ် ယာယီနေရာ ပြင်ဆင်နေသည့် ပခုက္ကူမြို့အမှတ်(၁)ရပ်ကွက်၊ လေယာဉ်ကွင်းဟောင်းရှိ ကျန်းမာရေးဝန်ထမ်းအိမ်ရာသို့ မတ် ၂၅ ရက် နံနက် ၁၀ နာရီက ခရိုင်နှင့်မြို့နယ် တာဝန်ရှိသူများ ကြည့်ရှုစစ်ဆေးသည်။

ကရင်ပြည်နယ်၊ ဘားအံမြို့နယ်၊ ဘားအံ-လှိုင်းဘွဲ ကားလမ်းမကြီးဘေး ဘားအံစက်မှုဇုန်ရှိ စက်ရုံအလုပ်ရုံများတွင် အသက်ရှူလမ်းကြောင်းဆိုင်ရာရောဂါ Coronavirus Disease 2019 (COVID-19) ရောဂါ ကြိုတင်ကာကွယ်ထိန်းချုပ်ရေး လုပ်ငန်းများ ဆောင်ရွက်ထားရှိမှုကို ကရင်ပြည်နယ်အစိုးရအဖွဲ့၊ လျှပ်စစ်နှင့် စက်မှုဝန်ကြီး ဦးစိုးလှိုင်နှင့် ဌာနဆိုင်ရာ တာဝန်ရှိသူများ သွားရောက်ကြည့်ရှု စစ်ဆေးခဲ့ကြောင်း သိရသည်။

မြန်မာ-ထိုင်း နယ်စပ်ဒေသ တာချီလိတ်မြို့ မြန်-ထိုင်း ချစ်ကြည်ရေးတံတား(၁)တွင် ထိုင်းနိုင်ငံသို့ သွားရောက်အလုပ်လုပ်ကိုင်လျက်ရှိသော မြန်မာအလုပ်သမားများမှ မိမိဆန္ဒအလျောက် ပြန်လည်ဝင်ရောက်လာသူများကို မတ် ၂၅ ရက်တွင် စနစ်တစ်ကျ ပြန်လည်လက်ခံလျက်ရှိသည်။

မန္တလေးတိုင်းဒေသကြီး မိတ္ထီလာခရိုင် မလှိုင်မြို့တွင် မြို့မစည်ပင်သာယာစျေးတွင် အများပြည်သူ အဝင်အထွက်များသည့် ဝင်ပေါက်များဖြစ်သည့် စျေးအရှေ့ဘက်ပေါက်နှင့် စျေးအနောက်ဘက်ပေါက်များတွင် COVID-19 ရောဂါကာကွယ်ရေး လက်ဆေးဘေစင်များ ထားရှိပေးခြင်းကို ယနေ့ နံနက် ၇ နာရီခန့်က ဆောင်ရွက်ပေးခဲ့သည်။

မန္တလေးတိုင်းဒေသကြီး၊ ကျောက်ပန်းတောင်းမြို့နယ်တွင် ကိုရိုနာဗိုင်းရပ်စ်ရောဂါ ကြိုတင်ကာကွယ်ရေး လုပ်ငန်းစဉ်အဖြစ် လိုအပ်လာပါက ရောဂါထိန်းချုပ် ကုသရေးဌာနများအဖြစ် ပြောင်းလဲအသုံးပြုနိုင်ရန် ရွေးချယ်ထားသည့် အဆောက်အဦများအား မတ် ၂၅ ရက် နံနက် ၁၁ နာရီက တိုင်းဒေသကြီး လွှတ်တော်ကိုယ်စားလှယ်များ၊ မြို့နယ်အုပ်ချုပ်ရေးမှူးနှင့် ဌာနဆိုင်ရာများ၊ ကျန်းမာရေးဌာနမှ တာဝန်ရှိသူများ ကွင်းဆင်းစစ်ဆေးခဲ့ကြကြောင်း သိရသည်။