မွန်ပြည်နယ်၊ မုဒုံမြို့နယ်၌ COVID-19 ကူးစက်မှုမရှိစေရန်ကြိုတင်ကာကွယ် သည့် အနေဖြင့် မြို့နယ်ရှိ ဘိုးဘွားရိပ်သာနှင့် မေတ္တာစံအိမ်မှ ကောင်မတီဝင်များ ယနေ့နံနက်  ၁၀နာရီတွင် အစည်းအဝေးဆုံးဖြတ်ချက်အရ မတ်လ၂၂ ရက်နေ့မှစ၍  ခေတ္တပိတ်မည်ဖြစ်ကြောင်း သိရသည်။

သင်္ကြန်ကာလအတွင်း ခရီးသွားပြည်သူများအဆင်ပြေချောမွေ့စေရေး၊ အဝေးပြေးကား လက်မှတ်ဝယ်ယူရာတွင် အခက်အခဲမရှိစေရန်နှင့် Covid-19 ရောဂါ ကြိုတင်ကာကွယ်ရေးပူးပေါင်း ဆောင်ရွက်နိုင်ရန် သင်္ကြန်ကာလအတွင်း ယာဉ်များ ကြံ့ခိုင်မှုရှိရန်၊ ယာဉ်မတော်တဆမှုမဖြစ်ပွားစေရန် ရန်ကုန်တိုင်းဒေသကြီး သယ်ယူပို့ ဆောင်ရေးကြီး ကြပ်ကွပ်ကဲမှု အာဏာပိုင်အဖွဲ့(YRTA)က ပူးပေါင်းဆောင်ရွက်လျက်ရှိကြောင်း သိရသည်။ 

ဧရာဝတီတိုင်းဒေသကြီး၊ ပုသိမ်ခရိုင်၊ ငွေဆောင်ကမ်းခြေတွင် COVID-19 ရောဂါ ကြိုတင်ကာကွယ်နိုင်ရေးအတွက် လာရောက်အပန်းဖြေကြသည့် ခရီးသွားဧည့်သည်များ၏ ကိုယ်ရေး အချက်အလက်များနှင့် တည်းခိုနေထိုင်မှု၊ ဝင်ထွက်သွားလာမှု၊ ပြန်လည်ထွက်ခွာမှုစာရင်းများအား ကောက်ယူခြင်းကို ယနေ့နံနက်ပိုင်းမှ စတင်ပြီးမြို့အုပ်ချုပ်ရေးမှူးနှင့် ဌာနဆိုင်ရာများပူးပေါင်း၍ ငွေဆောင်မြို့အဝင်တွင် ဆောင်ရွက်ခဲ့ကြောင်း သိရသည်။

မွန်ပြည်နယ် မော်လမြိုင်မြို့ မြို့ရှောင်လမ်း မော်လမြိုင်ဘူတာကြီးတွင် မတ် ၂၁ ရက်နေ့ နံနက် ၇ နာရီက အမှတ်(၉၀)အစုန် မော်လမြိုင်-ရန်ကုန် အမြန်လူစီးရထားအား လာရောက်စီးနင်းကြသည့် ခရီးသည်များနှင့် ခရီးသည်များ ကြိုပို့ရန် ရောက်ရှိနေကြသော ပြည်သူများကို မော်လမြိုင်ဘူတာကြီး တာဝန်ရှိသူများနှင့် အဖွဲ့သည် မုတ္တမမြို့ မီးရထားဆေးရုံမှ သူနာပြုဆရာမများနှင့် ပူးပေါင်း၍ Covid- 19 ရောဂါကြိုတင် ကာကွယ်ရေးအတွက် အပူချိန်တိုင်းကိရိယာဖြင့် တိုင်းပေးခြင်း၊ လက်သန့်ဆေးရည်များဖြင့် ဆေးကြောခြင်းများ ပြုလုပ်ပေးခဲ့ကြောင်း သိရသည်။

COVID-19 ကိုရိုနာဗိုင်းရပ်စ် ကူးစက်ပြန့်ပွားမှုကြောင့် မတ် ၂၁ ရက်နေ့ မနက်ပိုင်းအချိန် မြဝတီမြို့၊ ထိုင်း-မြန်မာ၊ချစ်ကြည်ရေးတံတားအမှတ်(၁)ကို နှစ်နိုင်ငံလုံးမှ ပိတ်ထားလိုက်ပြီဖြစ်၍ ယခင်က ကုန်စည်စီးဆင်းမှုတစ်ခုသာ ဆောင်ရွက်နေသော မြဝတီမြို့၊ ထိုင်း-မြန်မာ ချစ်ကြည်ရေးတံတား အမှတ်(၂) တွင် ခရီးသွားပြည်သူများ ဝင်/ထွက်သွားလာရေး အဆင်ပြေစေရန်အတွက် ကရင်ပြည်နယ်လွှတ်တော် ကိုယ်စားလှယ် ဦးသန့်ဇင်အောင်၊ ခရိုင်အုပ်ချုပ်ရေးမှူး ဦးတေဇာအောင်၊ ခရိုင် /မြို့နယ် ရဲတပ်ဖွဲ့၊ လဝက၊ အကောက်ခွန်ဦးစီးဌာနများရှိ တာဝန်ရှိသူများမှ သက်ဆိုင်ရာ ကဏ္ဍအလိုက် ဆောင်ရွက်ပေးနေကြောင်း သိရသည်။

ရန်ကုန်မြို့တော် စည်ပင်သာယာရေးကော်မတီရှိ မိဘပင်စင်စားများအနက် မြို့တော်ခန်းမရှိ ဘတ်ဂျက်နှင့် ငွေစာရင်းစာဌာနတွင် လစဉ်ငွေသားများ ထုတ်ယူနေကြသည့် ပင်စင်စားများသည် ၂၀၂၀ ပြည့်နှစ် မတ်လ ပင်စင် လစာငွေကို မတ် ၂၄ ရက် နေ့မှ စတင်၍ ၂၉ ရက်နေ့ထိ လစာထုတ်ရက်နှင့် အစိုးရရုံးပိတ်ရက်များမှအပ နေ့စဉ်ထုတ်ယူနိုင်မည်ဖြစ်ကြောင်း သိရသည်။